De publikaasje Do draachst de leafde oan befettet fragminten fan poëzy en proaza mei lesbyske, homoseksuele, biseksuele, transgender-tematyk. It giet der yn de blomlêzing net om hoe’t de skriuwer him- of, de skriuwster harsels definiearret, it giet om hoe’t in tekst him lêze lit, om hoe’t de redaksje dy tekst lêzen hat, nammentlik mei de rôze bril op. De kommende wiken publisearje wy wat priuwkes fan wurk dat yn de rôze blomlêzing opnommen wurdt.
De twadde bydrage yn dit dossier befettet wurk fan de jongste skriuwer, dat yn de bondel opnommen wurdt, en komt fan Joël Hut.
It Fryske orizjineel wurdt folge troch de Nederlânske oersetting.
en hij sjucht mij sjen
ik raan en ferhurdzje
myn hannen op syn skouders
myn lippen op syntes
de ûntknoping fan myn blau
myn rôs ducht er los
syn shirt oan 'e kant
ik freegje mar hij stiet mij ta
försichtich reitsje ik
syn littekens oan
mar bin hem krekt för
fjil syn böre
fjil dat it reind het.
en hij ziet me kijken
ik smelt en verhard
mijn handen op zijn schouders
mijn lippen op de zijne
de ontknoping van mijn blauw
mijn roze maakt hij los
zijn shirt omhoog
ik vraag maar hij staat me toe
voorzichtig raak ik
zijn littekens aan
maar ik ben hem net voor
voel zijn kater
voel dat het geregend heeft
Hjoed-de-dei skriuwt er inkeld yn it Súdwesthoeksk, de taal dêr’t er yn opgroeide. Syn debút wurdt yn juny dit jier ferwachte en sil dan ek folslein yn dy Fryske streektaal wêze. De jongerein is oer it algemien goed te sprekken oer syn wurk, al hat it bytiden wolris wat riedseleftichs.
(foto makke troch Line Hut)
Oer it dossier
De lanlike ‘Roze Zaterdag’ soe 20 juny yn Ljouwert hâlden wurde, mar skoot no in jier op fanwegen it coronafirus. Ta gelegenheid fan dy Rôze Sneon wurdt wurke oan in rôze blomlêzing út ’e literatuer fan Fryslân.
De blomlêzing kin mei it rike ferskaat in bydrage leverje oan akseptaasje, dokumintaasje, emansipaasje, ferdivedaasje, identifikaasje en represintaasje fan en foar rôs libben yn Fryslân.
De redaksje fan de rôze blomlêzing bestiet út Jelle Krol, Jantsje Post, Doeke Sijens, Janneke Spoelstra en Tsjerk Veenstra.
Diel 1 giet oer wurk fan Titia Brongersma.
